കോട്ടയം: സംസ്ഥാനത്ത് പാമ്പ് ശല്യം വര്ധിച്ചതോടെ ഗിനിക്കോഴികള്ക്ക് ആവശ്യക്കാര് വര്ധിച്ചിരിക്കുകയാണ്. കോഴി, പശു, താറാവ്, ആട് തുടങ്ങിയവയെ വലിയ തോതില് വളര്ത്തുന്നവരെല്ലാം സാധാരണയായി പാമ്പ് ശല്യത്തില്നിന്നു മൃഗങ്ങളെ സംരക്ഷിക്കാനായി ഗിനിക്കോഴികളെയും ഒപ്പം വളര്ത്താറുണ്ടായിരുന്നു. എന്നാല്, നിലവിലെ സാഹചര്യത്തിലാണ് ഗിനിക്കോഴിക്കായി കൂടുതല് ആവശ്യക്കാര് എത്തിയിരിക്കുന്നത്.
പുരയിടത്തിലുടെ എപ്പോഴും ശബ്ദമുണ്ടാക്കി നടക്കുന്ന ഇവ എല്ലാവിധ ചെറുപ്രാണികളെയും എലി, പാമ്പ്, മറ്റ് ഇഴജന്തുക്കളെയുമാണ് ഭക്ഷിക്കുന്നത്. രാത്രികാലങ്ങളില് മരങ്ങളുടെ മുകളിലാണ് ഗിനികള് വസിക്കുന്നത്. പറക്കാന് കഴിവുള്ള ഇവയ്ക്ക് ചുറ്റുപാടും നടക്കുന്ന കാര്യങ്ങളെ പെട്ടെന്ന് തിരിച്ചറിയാനും ചെറിയ അനക്കങ്ങളോടുപോലും പ്രതികരിക്കാനും സാധിക്കും.
പാമ്പുകളെയോ മറ്റു അപകടകരമായ എന്തിനെയെങ്കിലും കണ്ടാല് ഗിനിക്കോഴികള് വളരെ ഉച്ചത്തില് ശബ്ദം ഉണ്ടാക്കി മുന്നറിയിപ്പ് നല്കും. പാമ്പ്, മറ്റു ഇഴജന്തുക്കള് എന്നിവ ഇവയുടെ ശത്രുവര്ഗമായതിനാല് അവയെ കാണുമ്പോള് ഇവ കൂട്ടത്തോടെ ആക്രമണ സ്വഭാവം കാണിക്കാറുണ്ട്. അതിനാല് ഗിനി വളരുന്ന പറമ്പുകളില് പൊതുവേ പാമ്പിന്റെ ശല്യം കുറവാണെന്ന് പറയപ്പെടുന്നു. ഇതാണ് പാമ്പ് പോലെയുള്ള ജന്തുക്കളുടെ ശല്യം ഒഴിവാക്കാന് ഗിനിക്കോഴിയെ വളര്ത്താന് മനുഷ്യരെ പ്രേരിപ്പിക്കുന്നത്.
200 രൂപയില് താഴെയായിരുന്നു നേരത്തേ ഗിനിക്കോഴി കുഞ്ഞുങ്ങളുടെ വില. എന്നാല്, സംസ്ഥാനത്ത് പാമ്പ് കടിയേറ്റു മരിക്കുന്നവരുടെ എണ്ണത്തിലുണ്ടായ വര്ധനവ് ഗിനിക്കോഴിയെ വളര്ത്താന് കൂടുതല് ആളുകളെ പ്രേരിപ്പിച്ചു. ഇതോടെ ഒറ്റയടിക്ക് വില 400 രൂപയായി വര്ധിച്ചു.
റോബിന് ഏബ്രഹാം ജോസഫ്
